E tia te Minitita n te botaki ni mwakuri ibukin te Mauri ao Katoki Aoraki ae Dr Tinte Itinteang n taekinna bwa 7 n Eberi bon te bong are e kauringaki iai moan tein te Wold Health Organization are e teimatoa bukamaruana ni katoa ririki.

Te World Health Organization bon te rabwata ae tei ao ni katabeaki ibukin kaungan ao boutokan te marurung ao are e a kakauringaaki te bong anne n aban te aonnaba ake a kaaina te rabwata anne ni ikotaki ma Kiribati.

Te kibunikoora ibukin te kauring n te ririki aei bon “My Health My Right” are e karioki man te rabwata ae te WHO iaan norakin kanganga n te aonnaba aika a teimatoa n totokoa te marurung n aron ana makuri bibitakin kanoan boong ke te Climate Change, mwakuri n aki rau n aban nako te aonnaba ao mwakuri ni kakaokoroaki nakon temanna ma temanna (Discrimination).

E taku te Minitita bwa te kibunikora aio e mwanewea iai kakawakin inaomatara ngaira n tatabemanira nako ibukin karekean te marurung. Tiaki naba ti ngaia ma e taku riki bwa te kibunikora aio e bon kaineti naba ma ana boto ni iango te tautaeka ibukin uarokoan te I-Kiribati nakon te marurung.

E mwaneweia bwa e a tia te tautaeka rinanon ana kainibaire ibukin 20 te ririki ke KV20 ni katabea ana botaki ibukin te Mauri ao Katoki Aoraki ibukin katabangakakin katamaroan te mwakuri ni kuakua.

E taekinna naba bwa e korakora nanon te tautaeka rinanon te botaki ni mwakuri aio ibukin karikirakean ao katamaroan te mwakuri ni kuakua ake a tia ni wakinaki ao aika i aon kawaia n aron katean te On-Aoraki ae bubura iaon te kaawa ae Betio ao iaon Kiritimati, katean 30 clinic aika a boou ao karaoan mwakuri n onobwai nakon clinic iaon abamwakoron Kiribati, katean te auti ni bwain aoraki, reken te ibuobuoki mai irouia taokita mai Tiaina ma ana taan mwakuri te rabwata ae te MSF, te TB ward, kamwaitan baoia aoraki bwa ana waekoa n roko n te onaoraki, karokoan mitin aika a mwaka roiroi ao ai tabeua riki ni ikotaki ma reitakin te botaki ni mwakuri aio ma reirei aika a rietata ibukin karikirakean rabakau aika a boou ao karababan konabwai iaon mwakuri ni ibuobuoki.

Mai imwin tabeua ana maroro te Minitita n te tai anne ao e a taorimwiaki n te koro keke iroun te Moan Aine Madam Teraing Maamau ao buun te Minitita ao te Tia Tei temanna mai Betio.

Ake a roko ni kabobonga kanoan te botaki anne bon Beretitenti Taneti Maamau ma kainabana Madam Teiraeng Maamau ni ikotaki ma te Ambatita mai Aotiteria ae Karen Bray, te Ambatita mai Tiaina ae Ambassador Zhou Limin ao ai tabeman bwakuaku man te tautaeka ao ai tabeman riki aobitia ake a kabobonga kanoan te bukamaru anne, ao ai ni ikotaki ma unimwanen ao unaine Betio.

E karaoaki te bukamaru n te Sport Complex i Betio n 8 n Eberi are bon te motirawa ibukin te Health Day.